CHIMBINGA UNIQUE PUB YADHAMINI NA KUFANIKISHA BONANZA LA VILABU VYA JOGGING WILAYA YA KINONDONI

Siku ya jumapili tarehe 22 Januari, 2012 palifanyika bonanza lililoandaliwa na kuratibiwa na klabu ya michezo ya Biafra na kudhaminiwa na Chimbinga Unique Pub. Bonanza hilo lilishirikisha vilabu vya Namanga, Kunduchi Kwanza, Sotojo, Kawe, Kunduchi Veterani na wenyeji Biafra. Wanamichezo walikusanyika makao makuu ya klabu ya Biafra - 90 Degrees Pub Kinondoni kuanzia saa 12:30 asubuhi na mbio ziliishia katika Pub ya Chimbinga maeneo ya Kota Kinondoni. Fuatilia matukio kwa picha.

         

               Mwimbishaji wa Biafra Michael Silili akiwa na mwenyekiti wake Abdu Mollel

 Mwenyekiti wa Kunduchi Kwanza - Asia Mohamed (katikati) akiwa na Mwenyekiti wa Biafra pamoja na mwanachama Namanga John Gako (mwenye suruali nyeusi)

 Mtunza nidhamu wa Kawe Jogging (mwenye dredlocks) akiteta jambo na wanachama wake

 Baadhi ya wanachama wa Biafra wakibarizi muda mfupi kabla ya kuanza mbio

 Wanamichezo wakijipanga tayari kwa kuanza mazoezi ya mbio za pole pole (jogging)

 Ally Masharubu (mwenye bukta nyeusi) wa Biafra akiongoza mbio katika mitaa ya Stereo Kinondoni

 Ibrahim Kilasa (mwenye miwani) akiwaongoza watoto

 Wanamichezo wakiingia barabara ya Kawawa

Mgeni wa heshima Mzee Mkupete akitoa salam zake



 Katibu wa Biafra akiserebuka na dada Rose Mwakibugi almaarufu mamaa Chimbinga

 King A. Y. Mpore wa Biafra

Champagne ya kubariki siku hiyo ya bonanza ilifunguliwa kwa ustadi mkubwa na Robert Mwakibugi mwanabiafra na mkurugenzi wa Chimbinga Unique Pub 

 Neno la shukrani lilitolewa

BIAFRA SPORTS CLUB YAPATA USAJILI RASMI

Kwa furaha, tabasamu na bashasha, klabu ya michezo ya Biafra inapenda kuwaarifu wanachama, wapenzi, mashabiki, wadau pamoja na jamii kwa ujumla kwamba klabu hiyo imepata usajili rasmi na kupewa Namba ya Usajili  9848 tangu tarehe 20 Januari, 2012. Wanachama wote walipata taarifa rasmi ya usajili huo kupitia kwa mwenyekiti wa klabu siku hiyo hiyo kwenye kikao ambacho pamoha na mambo mengine wanachama walijumuika na kufurahi pamoja kwa kufungua 'champagne'.  

Barua inayoonyesha kusajiliwa kwa 'Biafra Sports Club'

Mwanachama mpya wa Biafra Sports Club  dada Edita a.k.a. Mama Ritchie akiibariki 'champagne' iliyotolewa maalumu kwa ajili ya kubariki usajili. Pembeni ni Katibu wa Biafra akisoma ujumbe wa pongezi kwa wanachama

BIAFRA KIDS YAANZA MWAKA 2012 VIZURI

Kwa heshima taadhima, viongozi, wanachama na mashabiki wa klabu ya Michezo ya Biafra wanawatakia wadau wote wa michezo heri ya mwaka 2012. Harakati bado zinaendelea na mwaka huu klabu yenu imedhamiria kufanya makubwa zaidi kwa manufaa ya wanachama, mashabiki na jamii kwa ujumla. Tarehe 14 Januari, 2011 pale katika viwanja vya Biafra kulikuwa na fainali ya ligi ya kugombea jezi ambapo kama kawaida timu yenu ya Biafra Kids ilimmenyana vikali na timu ya Mwenge shooting. Mchezo ulimalizika kwa timu ya Biafra Kids kuichabanga timu ya Mwenge Shooting kwa bao 1 bila lililowekwa kimiani na mshambuliaji mahiri wa timu hiyo anayejulikana kwa jina la Hussein Tajuddin a.k.a Chongo (pichani chini). Mgeni rasmi katika mchezo huo alikuwa ni Mwenyekiti wa klabu ya Biafra Abdul Mollel ambaye aliongozana na mwanachama mwengine Henry Maseko.

 

BIAFRA SPORTS CLUB YATOA POLE KWA WAKAZI WA DAR ES SALAAM BAADA YA KUKUMBWA NA MAFURIKO YALIYOTOKANA NA MVUA ZINAZOENDELEA KUNYESHA

Klabu ya michezo ya Biafra, inatoa pole kwa wakaazi wote wa Dar es Salaam ambao kwa namna moja au nyingine wameathirika na mafuriko ambayo yamesababishwa na mvua zinazoendelea kunyesha kwa siku ya tatu mfululizo Dar es Salaam na mikoa ya jirani ambayo kwa kiasi kikubwa imepakana na bahari ya Hindi.

 Hapa ni maeneo ya Kinondoni B bondeni kama unaelekea Msisiri

 Bwawa likiwa limefurika na kuingiza maji katika nyumba zinazolizunguka maeneo ya Msisiri

 

Kwa mujibu wa Wakala/Idara ya Hali ya Hewa mvua bado zitaendelea kunyesha na kuleta madhara zaidi. Hivyo, ni wajibu wa wananchi wote kuchukua tahadhari mapema ili kujiepusha na madhara zaidi lakini pia hatuna budi kuwasaidia wenzetu wameathirika na mafuriko haya huku wengine wakikosa makazi, chakula, mavazi na huduma muhimu za kijamii. Mpaka sasa vituo vinavyopokea watu walioathirika na mafuriko haya Shule ya sekondari ya Azania, Shule ya msingi Gilman Rutihinda Kigogo na kwa misaada ya kibinadamu unaweza kupeleka maeneo hayo pia.

 

 

     Inavyoonekana , bado mvua zitaendelea kunyesha hadi jumapili tarehe 25 Disemba, 2011 ambayo itakuwa ni siku ya kusherehekea sikukuu ya x-mass. Unaweza kutembelea blogu ya Muhidini Sufiani, Muhiddini Michuzi, Issa Michuzi, Maggid Mjengwa, John Badi na nyinginezo ili ujionee athari za mafuriko hayo kwa upana zaidi.

           

                                MUNGU IBARIKI TANZANIA, MUNGU IBARIKI AFRIKA

HAFLA YA SHUKRANI KWA WANAMICHEZO WOTE WALIOJITOLEA KATIKA KUFANIKISHA ZOEZI LA KUFANYA USAFI HOSPITALI YA MWANANYAMALA TAREHE 9 DISEMBA KATIKA PICHA

Baada ya kumaliza kazi ya kufanya usafi hospitalini pamoja na kugawa misaada kama ilivyopangwa, wanamichezo wote walirejea makao makuu ya klabu ya Biafra ambapo kulikuwa na hafla maalumu ya kutoa vyeti kwa wahisani, pamoja na klabu zote zilizoshiriki katika kufanikisha maadhimisho hayo. Mgeni wa heshima kwenye hafla hiyo alikuwa ni Mzee Faustin Makima ambaye ni mwenyeketi wa serikali ya mtaa wa balozi msolomi yalipo makao makuu ya klabu ya Biafra.

Wanamichezo wakicheza kwaito kabla ya kuanza kwa zoezi la utoaji wa vyeti

 Kwa niaba ya kampuni ya Esoshi General Trading Ltd, ambayo ilitoa paketi mia tano za maziwa ya Tanga Fresh, cheti kilipokelewa na Henry Byarugaba anayeonekana pichani hapo chini.

Mzee Kodi Siara almaarufu Serikali akipokea cheti kwa niaba ya kampuni ya TKT Ltd ambao walijitolea chupa zaidi ya mia tatu za maji ya uhai ya lita moja pamoja na biskuti ambazo ziligawiwa kwa watoto waliolazwa kwenye wodi ya watoto katika hospitali ya mwananyamala

Robert Mwakibugi akipokea cheti kwa niaba ya kampuni ya Promasidor (PTY) Tanzania. kampuni hiyo ilitoa boksi 20 zenye maziwa ya cowbell ya kopo

Bwana Tobias Owur akipokea cheti kwa niaba ya Royal Billy's Lodge ambao walijitolea mchango wa fedha taslimu pamoja fulana 60

Bwana Benson Simba akipokea cheti niaba ya kampuni ya Dabenco Enterprises ambao walijitolea fedha taslimu katika kufanikisha maadhimisho hayo

Bi. Asha M. Warisanga almaarufu mama Kenisha akipokea cheti kwa niaba ya Ninenty Degrees Pub ambayo ndio makao makuu ya klabu ya Biafra. Picha ya chini akikionesha cheti hicho kwa wanamichezo waliohudhuria hafla hiyo

 Bi. Asia Mohamed ambaye ni mwenyekiti wa klabu ya Kunduchi Kwanza akipokea cheti kwa niaba ya Klabu ya Kunduchi Kwanza ambayo ni miongoni mwa klabu zilizofanikisha kazi hiyo.

Bwana Olest Kalembo (Makamu mwenyekiti wa klabu ya namanga) akipokea cheti kwa niaba ya klabu ya Namanga ambayo ni moja klabu kongwe zinazohamasisha mbio za pole pole katika wilaya ya Kinondoni. Klabu hiyo pia ni miongoni mwa klabu zilizofanikisha zoezi hilo.

Bwana Betwely Kyando (katibu mkuu msaidizi wa klabu ya Biafra) akipokea cheti kwa niaba ya klabu ya Biafra

Mgeni wa Heshima mzee Faustin Makima (mwenye kofia) akiwa pamoja na viongozi wa klabu za Namanga na Kunduchi Kwanza pamoja na Biafra mara baada ya kumaliza zoezi la utoaji wa vyeti

Baada ya kumaliza zoezi la utoaji wa vyeti wadau waliendelea kujipatia vinywaji, chakula na burudani mbalimbali hasa muziki

ZOEZI LA KUFANYA USAFI WA MAZINGIRA NA KUGAWA MISAADA KATIKA HOSPITALI YA MWANANYAMALA TARE 9 DISEMBA, 2011 LAFANIKIWA KWA KIASI KIKUBWA

Klabu za michezo za Biafra, Namanga na Kunduchi Kwanza, katika kuadhimisha miaka 50 ya Uhuru (1961 - 2011) ziliazimia kufanya usafi wa mazingira pamoja na kugawa misaada kwa wagonjw katika Hospitali ya Mwananyamala ambayo ni hospitali ya Wilaya Kinondoni. 

Wanamichezo pamoja na wadau wengine wote kutoka Kunduchi, Namanga na maeneo tofauti tofauti ya jiji la Dar es Salaam walianza kuwasili katika viwanja vya Biafra - Kinondoni kuanzia saa 12:30 asubuhi kwa ajili ya kugawiwa fulana zenye ujumbe mahususi kwa ajilia ya siku hiyo pamoja na maandalizi ya kuanza mbio za pole pole (jogging) kuelekea sehemu ya tukio - hospitali ya Mwananyamala.

Kama inavyoonekana pichani, msafara wa wanamchezo uliwasili katika hospitali ya Mwananyamala mnamo majira ya saa 1:20 asubuhi

Ili kuondoa usumbufu wa kelele kwa wagonjwa katika hospitali ya Mwananyamala, wanamichezo waliingia hospitali kwa mbio za pole pole kimya kimya (Picha kwa hisani ya Blogu ya John Badi)

Mara tu baada ya kuwasili lilifuatia zoezi la kugawana vufaa vya kufanyia usafi na majukumu mengine. Pichani ni mwanahabari mkongwe John Badi  (mwenye kamera) pamoja na dada Asia Mo'hd (mwenyekiti wa Kunduchi Kwanza Sports Club na Bw. Tobias Owur (mkurugenzi wa Royal Billy's Lodge)

Zoezi la kufanya usafi wa mazingira likaanza moja kwa moja kama wanavyoshuhudiwa wanamichezo wakizoa taka

Mwanabiafra Robert Mwakibugi hakuwa nyuma katika kuhakikisha shughuli inafanyika kwa ufanisi zaidi, hapa anaonekana akiweka 'gloves'zake vizuri tayari kuingia kazini

Mwanabiafra Robert Mwakibugi kiwakilisha maziwa ya cowbell yaliyotolewa na kampuni ya Promasidor kwa watoto waliolazwa kwenye hospitali ya Mwananyamala 

Viongozi wa klabu za Biafra na Kunduchi wakikabidhi sehemu ya msaada kwa viongozi wa hospitali

Katibu wa hospitali ya Mwananyamala akipokea sehemu ya paketi 500 za maziwa ya tanga Fresh kwa ajili ya kugawa kwa wagonjwa hospitalini hapo

Baadhi ya wasanii wa bendi ya mapacha watatu wakiongozwa na Khalid Chokoraa wakikabidhi maziwa ya Tanga Fresh kwa Katibu wa Hospitali ya Mwananyamala

Khalid Chokoraa akigawa maziwa ya cowbell kwa wazazi katika wodi ya wazazi

Wadau wakiwajulia hali wagonjwa hospitalini

Mwanabiafra mzee Faustin Makima akimkabidhi mmoja wa wagonjwa mche wa sabuni

Mweka hazina wa klabu ya Namanga Michael J almaarufu Mopao akimkabidhi maziwa ya Cowbell moja wa wazazi aliyejifungua wakati wa mkesha wa maadhimisho ya miaka 50 ya uhuru

Mwenyekiti wa klabu Kunduchi Kwanza Asia Moh'd akimpa biskuti mtoto aliyelazwa hospitalini hapo kutokana na majeraha ya kuungua moto

Pichani ni dada katibu msaidizi wa Klabu ya Namanga (mwenye suruali nyeusi) na Bi. Everlast wakiendelea na usafi

Akiwakilisha klabu ya Namanga mzee Ibrahim Lincoln almaarufu 'Mjomba'

Wadau wengine walikumbushi enzi kwa kukamata mpini wa jembe na kulima kama wanavyoonekana pichani

Mwanabiafra  Mustafa Muro akifyeka majani

Wanamichezo wakijadiliana

Pichani kutoka kushoto ni Angel, Happy Mdeka na Khamis S. almaarufu Masharubu

 

Wengine walifanya usafi huku wakicheza muziki na tabasamu la hali ya juu kama wanavyoonekana pichani wanamichezo hawa

Mwimbishaji maarufu wa klabu ya Namanga almaarufu Likopa akionesha kipaji cha mchezo wa sarakasi mara baada ya kumaliza zoezi la kufanya usafi hospitalini hapo

Wanamichezo wengine walichangia damu kwa wagonjwa hospitalini hapo kama anavyoonekana Mama Kenisha mara baada ya kutoa damu akiwa pamoja na wanamichezo wengine

Baada ya kumaliza kazi ya kufanya usafi hospitalini pamoja na kugawa misaada kama ilivyopangwa, wanamichezo wote walirejea makao makuu ya klabu ya Biafra ambapo kulikuwa na burudani kadha wa kadha na likafuatiwa na zoezi la utoaji wa vyeti kwa wahisani, pamoja na klabu zote zilizoshiriki.